પત્રકારત્વ ભવન દ્વારા ડિજિટલ ફિલ્મ મેકિંગ વર્કશોપનું આયોજન

• તા.17,18,19 ફેબ્રુઆરી 2026 દરમિયાન જાણીતા ઇન્ટરનેશનલ એવોર્ડ વિજેતા, ફિલ્મ મેકર તથા ઇસરોના પૂર્વ પ્રોગ્રામ પ્રોડયુસર શ્રી કમલેશ ઉદાસી વિધાર્થીઓને તાલીમ આપશે
• મોબાઇલ દ્વારા શોર્ટ ફિલ્મો તથા રીલ્સ બનાવવાની પધ્ધતિસરની તાલીમ મળશે
• એડ ફિલ્મ અને શોર્ટ ફિલ્મના નિર્માણના તમામ પાસાંનું જ્ઞાન મળશે.
• ભાગ લેવા ઇચ્છતા વિધાર્થીઓ 13મી ફેબ્રુઆરી સુધીમાં રજીસ્ટ્રેશન કરાવી શકશે

રાજકોટ

21મી સદીમાં ડિજિટલ મીડિયાએ સૌથી ઝડપી અને અસરકારક માધ્યમ બની રહયું છે ત્યારે વિધાર્થીઓ તથા યુવા મીડિયા પ્રોફેશનલ્સ માટે શ્રી એ.ડી.શેઠ પત્રકારત્વ ભવન, સૌરાષ્ટ્ર યુનિવર્સિટી દ્વારા ડિજિટલ ફિલ્મ મેકિંગ વિષય પર ત્રણ દિવસીય વર્કશોપનું આયોજન કરવામાં આવ્યું છે. આજે તમામ વિષયના વિદ્યાર્થીઓ તથા મીડિયા પ્રોફેશનલ્સ માટે ડિજિટલ ફિલ્મ મેકિંગ માત્ર શોખનો જ નહીં પરંતુ જરુરિયાતનો વિષય બની ગયો છે. ફિલ્મ ક્ષેત્રના વ્યવસાયીઓ ફિલ્મ મેકિંગ માટે આધુનિક ટેકનોલોજીનો ઉપયોગ કરે છે ત્યારે આ વર્કશોપમાં માત્ર મોબાઇલ ધરાવતા શોખીન પણ તેના મોબાઇલથી ફિલ્મો અને રીલ્સ બનાવવાનું પધ્ધતિસર જ્ઞાન મેળવી શકે છે. માકેર્ટિંગ, ફેશન ડીઝાઇનિંગ, આર્કીટેકચર અને ઇન્ટીરીયર ડેકોરેશન અને એડવર્ટાઇઝીંગ તથા અન્ય ક્ષેત્રે કામ કરતા લોકો ફિલ્મ મેકીંગનું જ્ઞાન મેળવીને પોતાનું પ્રેઝન્ટેશન ઉત્તમ રીતે કરી શકે છે.

સૌરાષ્ટ્ર યુનિવર્સિટીના પત્રકારત્વ ભવન દ્વારા વિધાર્થીઓની કુશળતા વિકાસ માટે સતત આવા તાલીમ કાર્યક્રમોનું આયોજન કરવામાં આવે છે. પત્રકારત્વ ભવનમાં વર્ષ 1973થી પત્રકારત્વનો અભ્યાસક્રમ ચાલી રહયો છે. આ કોર્ષમાં પત્રકારત્વના પાયાના સિધ્ધાંતોથી લઇને તેના તમામ પાસાઓની થિયોરેટીકલ તથા પ્રેકટીકલ તાલીમ આપવામાં આવે છે. તેમજ પ્રતિવર્ષ શૈક્ષણિક કામગીરીની સાથે વિધાર્થીઓને મીડિયાના વિવિધ ક્ષેત્રોનું પ્રાયોગિક જ્ઞાન મળે તે માટે વિવિધ વર્કશોપનું આયોજન કરવામાં આવે છે. જેના ભાગરુપે આ વર્ષે તા.17,18,19 ફેબ્રુઆરી 2026ના રોજ ડિજિટલ ફિલ્મ મેકિંગ વર્કશોપનું આયોજન કરવામાં આવ્યું છે. આ વર્કશોપમાં નિષ્ણાત તરીકે જાણીતા ઇન્ટરનેશનલ એવોર્ડ વિજેતા ફિલ્મ મેકર તથા ઇસરોના પૂર્વ પ્રોગ્રામ પ્રોડયુસર શ્રી કમલેશ ઉદાસી ઉપસ્થિત રહેશે. ઇસરો સાથે લાંબા સમય સુધી જોડાયેલા રહેલા શ્રી કમલેશ ઉદાસી ડોકયુમેન્ટરી ફિલ્મ, શોર્ટ ફિલ્મ, એડ ફિલ્મના વિવિધ પાસાઓ, પ્રિ-પ્રોડકશન, પોસ્ટ પ્રોડકશન, શુટીંગ, સ્ક્રિપ્ટ રાઇટીંગ વેગેરે ક્ષેત્રોને બહોળો અનુભવ ધરાવે છે. ત્રણ દિવસ દરમિયાન તેઓ પોતાના વિશાળ અનુભવના આધારે વિધાર્થીઓને ફિલ્મ મેકિંગ અને મીડિયા ક્ષેત્રની પ્રાયોગિક તાલીમ આપશે.

પત્રકારત્વ ભવન દ્વારા આયોજીત આ વર્કશોપનો મુખ્ય હેતુ વિધાર્થીઓને સ્ક્રિપ્ટ રાઇટિંગ, કેમેરા ઓપરેશન, લાઇટીંગ, સાઉન્ડ રેકોર્ડિંગ, વિડિયો એડિટિંગ, સ્ટોરીટેલિંગ તથા આધુનિક ડિજિટલ ફિલ્મ નિર્માણની ટેકનિક અંગે પ્રાયોગિક અને સિધ્ધાંત આધારીત તાલીમ આપવાનો છે. તેમજ વર્કશોપમાં ભાગ લેનાર તમામ વિધાર્થીઓને પ્રમાણપત્ર આપવામાં આવશે. ઉપરાંત, તેમને પોતાનું સર્જનાત્મક પોર્ટફોલિયો વિકસાવવાની અને ફિલ્મ તથા ડિજિટલ મીડિયા ઉદ્યોગમાં કારકિર્દી બનાવવા માર્ગદર્શન મળશે.

આ ક્ષેત્રમાં રસ ધરાવતા અથવા કારર્કિદી બનાવવા ઇચ્છુક વિધાર્થીઓ તથા અન્ય લોકો આ વર્કશોપમાં ભાગ લેવા માટે તા.13-2-2026 સુધીમાં પત્રકારત્વ ભવનમાં રુબરુ અથવા ફોન નં. 0281-2586418, મો.97258 80455 પર બપોરે 11થી 5 સુધીમાં સંપર્ક કરી રજીસ્ટ્રેશન કરાવી શકશે.